يوميات سامي المنفصم شخصيا - الحلقة 48 - نانسي عجرم والصورة

 من كذا سنة، سامي كان مسافر ووصل مطار القاهرة وخلص الإجراءات وكان لسه قدامه ساعة على ميعاد الطيارة فراح قعد في كافيه وطلع اللابتوب بتاعه علشان يضيع شوية وقت. بعد شوية حس سامي بشوية لبش وقام دخل جروب ناس نفس الكوفي شوب وقعدوا.

سامي شباب القلب وهو أكتر واحد فضولي في السوامي: "هو فيه إيه؟"

سامي الحكيم: "مش عارف. واضح فيه حد مشهور في المجموعة دي."

سامي شباب القلب قعد يبحلق ناحية الجروب كام ثانية وفجاة قام قام مبرق عينيه وقال: "إلحقوا يا جدعان، دي نانسي عجرم!!!!!"

هب كل السوامي من مكانهم وقعدوا يتفرجوا على نانسي عجرم وقعد سامي شباب القلب يتنطط في مكانه ويلف حوالين نفسه وهو بيضحك وبيغني: "أخاصمك اه...أسيبك لا"

وبعد وصلة رقص وغنا وتنطيط، سامي شباب القلب بص للسوامي وقاللهم: "لازم ناخد صورة معاها"

السوامي ابتسموا وبصوا لبعض وسامي الحكيم قال: "ممكن. فكرة حلوة"

سامي الخجول كان مستخبي ورا طول الوقت وأول ما جابوا سيرة الصورة وشه قلب وقام اتحرك قدام وقال: "ما حبكتش يا جماعة. مالهاش لزمة."

سامي شباب القلب: "إزاي بس؟ ده الكافيه مافيهوش غيرنا. دي فرصة ما تتعوضش"

سامي الخجول: "هي جاية المطار علشان تسافر وممكن تبقى تعبانة ومش عايزة تتصور"

سامي شباب القلب: "هو أنا قلت إني هلعب ماتش باسكت معاها. هي صورة في السريع"

سامي الخجول: "إفرض لما نطلب منها تقوللنا لأ"

سامي شباب القلب: "وتقول لأ ليه يعني؟ يا ابني يا حبيبي بطل الهواجس اللي عندك"

سامي الخجول: "ما أنا مش عايز نتحط في موقف بايخ ويبقى شكلنا سخيف."

سامي شباب القلب ابتدى يتعصب: "موقف بايخ إيه يا عم؟ دي صورة. هناخد صوووورة. مش رايح أتقدملها"

سامي الخجول: "طب هنقوللها إيه؟ عايزين صورة كده وخلاص؟"

سامي شباب القلب: "مش فاهم؟ هو عيب وأنا مش واخد بالي ولا إيه؟"

سامي الخجول: "قصدي المفروض نقوللها إننا من المعجبين بتوعها وكلمتين كده وبعدين نطلب بتصور. لو طلبنا نتصور بس ممكن تحس إننا مهتمين بالصورة بس وممكن تتضايق"

سامي شباب القلب وهو خلاص زهقان: "معلش يا بابا. ما تقلقش مش هتتضايق. وأوعدك هنقوللها إننا من المعجبين وكده"

سامي الخجول: "إفرض بقى زنفتنا وسألتنا إيه أحسن أغنية بنحبها؟ أو لو سمعنا آخر ألبوم ليها وإحنا أصلا ما سمعناهوش؟ ممكن نتبرجل وتعرف إننا مش بنسمعلها قوي"

سامي شباب القلب وهو بيحاول ما يتعصبش اكتر: "يا حبيبي ده مش إنترفيو شغل. هي مش هتختبرنا علشان تقرر تتصور معانا ولا لأ. هي مش فاضية أصلا تقعد تاخد وتدي معانا في الكلام. هتبقى عايزانا ناخد الصورة في السريع ونمشي"

كان ساعتها سامي الخجول مش مركز معاه لإنه بيحاول يفتكر أسامي أغاني نانسي عجرم.

سامي الخجول وهو بيكلم نفسه: "مش قادر افتكر أسامي أغانيها. فيه أخاصمك اه بس دي قديمة. ايه كمان يا واد يا سامي؟ هي عملت إيه جديد؟"

سامي شباب القلب قام شخط فيه: "بس بقى. هي مش هتسألنا على أسامي أغانيها. مش امتحان هو. اهمد بقى وخلينا نروح نتصور"

وهما قاعدين بيتكلموا، دخل واحد الكافيه وراح لنانسي عجرم واتصور معاها ومشي.

سامي شباب القلب شاور على الرجل وهو خارج وبص لسامي الخجول وقاله وهو طهقان: "شفت؟ إنت قاعد بتعقد الموضوع وبتكلكعه وأهو واحد إتصور عادي ومشي. ولا هي ضربته ولا شتمته ولا استجوبته. الموضوع خد ثواني"

سامي الخجول كش في مكانه وقال: "طيب طيب. هنروح أهو نتصور"

وقعد كام ثانية بيحاول يشجع نفسه وبعدين قال: "طب هنتصور إزاي؟ نقف ورا الكنبة اللي هي قاعدة عليها ولا نطلب منها تقف ولا نعمل إيه؟"

سامي شباب القلب: "يا ربي الرحمة. لما نروح نطلب نبقى نشوف. ورا الكنبة، فوق الكنبة، تحت الكنبة، مش فارقة. المهم نتصور ونخلص. بعد شوية مش هنلاقي حاجة غير الكنبة نصورها"

وقعد سامي شباب القلب يحاول يقنع سامي الخجول يقوم لحد ما نانسي عجرم والجروب بتاعها قام وخرج من الكافيه واختفوا.

سامي شباب القلب انهار وقال: "لااااااااااااا. حرااااااااااام. ليه تعمل كده فيا؟ ده إنت فااااااااااشل"

ولحد النهارده سامي شباب القلب مش قادر ينسى اللحظة دي ومش مسامح سامي الخجول.